Alla Itolae Nusa 15

Pela bei mere Abrame nindaleini kena TUHANE Ibeteke lokoi be, “Abrame, rilamu yake le Au rakamu bei susate. Namake Au riluke hadia elake etemu.”

Abrame iralake be, “Tuhane ALLAH, Ariluke saisa ete aure? Au matare auku anae sae mo, kai namake Eliesere, auku tamata makerike bei Damsike pine ikbasae auku luma meije.”

Kai ibeteke lekwe be, “Ariluke auku anubu sae mo eti tatike pine sae bei auku tamata makerike ikbasae auku taneiaru.”

Po TUHANE Ibeteke lokoi be, “Tamata meije ikbasae amu taneiaru mo, le tatike pine amu anare ruai pine ikbasaelu.”

Eleki TUHANE Ikeri Abrame isiri kai Ibeteke lokoi be, “Alimese lolete lanite! Aneheke kmalea ndeteru sepo asupu nehekelu. Namake Au ono amu anubuaru esi boka titinai lupe kmalea ndeteru, eti sae isupu neheke ruasi mo, saka kmalearu lekwe sae isupu neheke rualu mo.”

Abrame ipersaye TUHANE Eni lepate mere, hoko TUHANE Iselu Abrahame tamata maka ono nkenale.

Eleki TUHANE Ibeteke lokoi be, “Aure, amu TUHANE rebe Au keri asiri bei Ur-Kasdime leke Au riluke tapele meije eleue ale.”

Eleki Abrame ibeteke lokoI be, “Tuhane ALLA, bei saisa pine au rekwa be tapele meije aukuere?”

Eleki TUHANE Ibeteke lokoi be, “Ariluke lembu inaije inai esa rebe esi musuna telu, pipi inaije inai esa rebe esi musuna telu, domba tulene inai esa rebe esi musuna telu, manu tekukure inai esa kai manu abune beluke inai esa eteKu.”

Eleki irana pusue binatana meru eleki isaliu kena lua, eleki itolalu balale lomai kena pauti lua. Po manuaru isaliu moneka.

Kena manu maka kane aklalinaru uluake sabuke kena aklalina meru hoko Abrame isuilu.

Kena lemataije eono kena esuni nere, Abrame intulu blake moneka. Eleki kpetu kurule kenai hoko rilai titinai.

Eleki TUHANE Ibeteke lokoi be, “Alene mimise! Namake amu anubuaru esi ono tamata maka luake beluke kena nusa rebe esie mo, kai esi ono tamata maka ulake rebe esi kbasa sae more ete mere, kai esi supu susate bei tamata nusa mere musuna utuna ata.

Po bangsa rebe esi ono amu anubuaru kena tamata makerike rebe esi kbasa sae more, Au hukumesi kai Au ono amu anubuaru esi siri bei mere kai esi keri taneia bokala.

Po ete ale, amata kena misete kena antua titinai peneka, eleki esi hnouke ale.

Kena amu anubuaru esi rulu rebai ata peneka, eleki esi leu lomei suike, le kena meije tamata Amoriaru esi neune ktili kuate mosa hoko Au hukumesi mosa.”

Eleki kena lemataije suni peneka iselu otoi maka tolae awe rebe ono bei tapele, esi kweini kai obore rebe ekliti ulia loko aklalina rebe salilu minare esi tlelaru.

Kena petu mere TUHANE Italuke misete kai Abrame be, “Au riluke tapele meije ete amu anubuaru, menai bei mpai Mesire esi ote roma ndi kwele elake Eprate,

rebe tamata Keni, tamata Kenase, tamata Katmone,

tamata Hete, tamata Perise, tamata Repaime,

tamata Amori, tamata Kanane, tamata Girgasi kai tamata Yebuse esi tapelaru.”